إعلان فيس بوك

شارك هذه المقالة مع أصدقائك!
بوست لكل اخواتنا الشقيانين العبانين المتبهدلين بتوع الحملات الإعلانية.
 ‏ولكل صاحب بيزنس عايز يعمل إعلان ع اللي ما يتسمى فيسبوك

 إمتا تعمل إعلان ممول ع الفيس؟

١) لما تتأكد إن الفيس مفهوش مشاكل.

٢) لما تتأكد إن الفيس مبيعدلش ف الوقت ده ع سياسات عمل الإعلانات.

٣) لما تلاقي شكاوي كتير من المعلنين اخواتك+(٢٠٠ بوست) شكاوي ع كل جروبات التسويق والميديا.

٤) لو هتعمله ع (البلات فورم) الغلط.
واللي مش عليها أغلب الجمهور اللي مهتم باللي انت بتبيعه.

٥) لو إعلاناتك هتبقا (سبام) ومضلله.
ومش بتوعد الجمهور بحاجة انت تعرف توفيها.

٦) لما تكون عايز تعمل للجمهور مفاجأة ف وقت (حزن عام).
 يعني متعلنش عن مسابقة بمناسبة (السنة العاشرة) لافتتاح محلاتكوا،وفيه حالة (حزن عام وحداد) بسبب كارثة لسه حاصله.

٧) لو متعرفش هما مين ال (audience) بالظبط وساكنين فين،عمرهم قد إيه،طموحاتهم،مشاكلهم ،اللايف االإستايل بتاعهم،وهواياتهم….إلخ (البيرسونامن الأخر).😉

٨)لو ممعكش حد يكتبلك (محتوي).
 يقدر يأثر ف الجمهور بتاعك كويس،يكون شاطر وفاهم كل كلمة مكتوبه ف الإعلان،وعارف كمان غرض وهدف كل كلمة.

٩) لو مش عارف وقاري سياسات الإعلان بتاعة الفيس كويس.وعشان متلبسش ف (حيطة حظر الإعلانات).

١٠) لو حاطط ميزانية ع قدها شويتين تلاته وعايز توصل ل (٧٣٧٣٨٣٩٩٣٨٣٨٣٩) شخص.

١١) لو مش هتقدم للجمهور قيمة/معلومة هتفيده ع (المستوي الشخصي) قبل ما تفيد البيزنس نفسه.

١٢) لو هتعمله بس لمجرد الترفيه واللعب مع الجمهور.

١٣) لو مش ناوي تسمع كلمة (test) وعارف قيمة ال (test) ف الإعلان وف التسويق عموما.

١٤) لو مش هتقدر ترد ع الجمهور واحد واحد/رسالة رسالة/كومنت كومنت برد خاص بيه؛يحس انك بتكلمه هو لوحده.
 أوتجيب (مودريتور شاطر حابب شغله) يتعامل. لسانه حلو،يعرف يتعامل مع الناس بطريقة ودية،يقدر يبني مع الجمهور علاقة قوية تحببهم ف البرلند بتاعك،ويخليهم يشتروا بعد كده حتا لو مش مستعدين دلوقتي؛لأن تعامل المودريتور ساب ف نفسيتهم أثر إيجابي وحلو ومسكر ولذيذ.

١٥) لو بينك وبين المصممين مصانع الحداد والنجار والسلك الألمنيوم.
وناوي تنزل الإعلان بتصميم شايل ولو حتا (٦٠%) من الاحترافية.

١٦) لو مش متقبل فكرة إن الإعلان ممكن يفشل.
عادي يعني بتحصل بس مش ده الطبيعي أكيد. ولازم ساعتها تدور ع السبب الحقيقي وتعدله.

طب تعمله إمتا بقا؟

١) ف بداية كل مرحله من السيلز فانيل ( ٥ مراحل).

٢) لما تقعد  الأول مع الكانتنت ريتر وتقوله هدفك إيه من الاعلان وتقوله مين الجمهور اللي انت مستهدفه وتكلمه عنهم شوية وعن البيزنس بتاعك بشكل عام.

٣) ف المواسم زي عيد الام لو انت بتبيع منتج او خدمة متعلق بالمناسبة ده.

٤) ف الاجازات لو بتبيع كورسات.

 ٥) لما يكون فيه حاجات لازم تعمل فيها اعلانات  اللي تستحق وقيمة بالنسبة للجمهور زي كتاب مهم تسجيل ف كورس مجاني اي حاجه قيمة جدا ومجانية وبتقدم فادة للجمهور وتحفزهم انهم يتابعوك بعد كده.

وأخيرا!
تعمل إعلان ممول لما يكون فيه عكس كل الحاجت اللي قولناها ف (امتا متعملش إعلان).

وبما إننا بنتكلم ف الإعلانات
فالبوست الجاي  هيكون عن أعمدة الإعلان الأربعة اللي من غيرهم مش هيكون إعلانك إعلان ناجح.

لو النصايح عجبتك اعمل شير ومينشن لإخواتك المعلنين الشقيانين.😄
يمكن فيه نصيحة تفيدهم ف شغلهم ويدعولك.

واعمل برده شير؛عشان كل صاحب بيزنس يكون فاهم الدنيا كويس.
 وإن الإعلان مش شوية فلوس بتحطهم ف جيب مارك؛هيجيبلك الجمهور المستهدف دليفري ف كروتونه لحد باب البيت.

‫0 تعليق

اترك تعليقاً