افضل طرق للتسويق الجرافيك ديزاينر

شارك هذه المقالة مع أصدقائك!

كيف تسوق لنفسك ك (graphic designer)؟


لو انت جرافيك ديزاينر ومش عارف تسوق شغلك. أو بتسوق أو ناوي تسوق لجرافيك ديزاينر!

دي شوية افكار سريعة كده تساعدكوا ان شاء الله 23 فكرة لتنجح !😍

١) اعرض شغلك ف مواقع التصميم زي:
بيهانس،
بنت رست (استهدي بالله وسوقي شغلي يابنتي)😂
إنستجرام.
٢) اعرض شغلك ف جروبات التصميم زي:
Designers union
Branding
مصممين ع الناصية
خبرات مصمم
٣) اعرض شغلك ف جروبات التصوير والإيديت زي:
(فونوجرافي).
٤) اعملك صفحة ونزل شغلك كله عليها.
وممكن بعد فترة تعمل إعلان ممول،وتستهدف الناس الصح مع صور بأحسن بروجيكتس ليك زي:
صفحات السوشيال ميديا،
الناس اللي بتعمل إعلانات ممولة،
بعض المحلات/البراندات…إلخ.
٥) خليك متفاعل دايما ع الجروبات ده وصفحتك بنصايحك وشغلك.
٦) لو بتشتغل ع تصاميم سوشيال ميديا نزلها ع جروبات السوشيال ميديا زي (سوشيال ميدياوي) بيبقا عليها ناس كتير طالبين مصممين سوشيال.
٧) ابعت تهنئة للعمال اللي اشتغلت معاهم قبل كده ف الأعياد والمناسبات،وكلمهم بطريقة ودية.
واعمل معاهم (relationship) قوية وقرب منهم؛عشان لما يحبوا يعملوا شغل تاني؛تبقا انت أول واحد يجي ع بالهم.
٨) اعملك إيميل ع مواقع الفري لانسر زي:
فري لانسر
خمسات (لو لسه مبتديء)
أب ورك
فايفر
(99desing) (خاص بالمصممين)
٩) نزل شغلك ع جروبات الفري لانسرز زي (فري لانسر مصر وغيرهم كتييير).
١٠) اعمل تصميمات وتعديلات ع صور أشخاص مشهورة وأحداث وأشخاص تريند.
هيا ده اللي هتعمل (attention) من الناس وتلمهم حواليك ع الشغل بتاعك،وهتاخد شيرات وتنتشر بالهبل (Go viral).
١١) الخطوة دة مهمة جدااا ومش هياخدها إلا اللي عايز يوصل وبسرعة!
اعمل قناة ع اليوتيوب،ونزل عليها شغلك.
واعمل (tutorials) تعلم الناس.
‏وحتا لو هتعلمهم انت عملت شغلك ده ازاي،وتبين انك شخص دكتور جراح وفاهم ف شغلك ومنطقتك كويس أوي.
١٢) فيد غيرك ع قد ما تقدر ورزقك هيزيد!
انا اعرف صديق نزل ع (عمو يوتيوب) فيديو فوتوشوب بسيط.
بيتكلم فيه عن استخدام ال (بن تول)؛وجاله بسببه (عشراااات) الأوردرات.😵
‏ملحوظة:
‏حاول تتعلم (youtube seo)؛عشان تخلي فيديوهات قناتك ت (rank) ع اليوتيوب وتبقا ف نتايج البحث الأول.
‏والموضوع كله مش هياخد منك اكتر من (٣ أيام) فمتصعبش الموضوع ع نفسك.😁
١٣) حاول تعرض شغلك ع براندات كبيرة لو انت فعلا محترف وواثق من شغلك.
انت فنان..
انت قدها💪💪
١٤) حط شغلك ف ملف (pdf) ووريها للعميل اللي يطلب شغلك+لينك البيهانس؛عشان فيه بعض العملا بتستغرب موقع بيهانس وبتحس نفسها لايصه ومحتاسه فيه.
خاصة،لو أول مرة تدخل ع الموقع.
١٥) ظبط (البروفايل) بتاع الفيس وحط فيه كل لينكاتك الجميلة.
١٦) اقرا ف كتب عن (علم التفاوض/الإقناع)؛عشان تعرف ازاي تظبط ال (deal) مع العميل.
وتطلع كسبان.
ويحس كمان انه اختار الشخص الصح،بالسعر المناسب،وبجودة التصميم اللي بيدور عليها.
-كيف تجعل اي شخص يقول لك نعم ف ٨ دقائق فقط.(كتاب حلو جدا وعجبني).
١٧) نزل بوست ف الجروبز اللي قولناها فوق بتعلن فيه ع إنك هتعمل لأول (٣ أشخاص) تصميمات مجانية أو بنص الثمن؛
عشان تشجع اللي عايزين خدمات زي ده يستفسروا، ويسألوا،وتوريهم شغلك،وتظبط معاهم الدنيا.
عشان يبقا فيه فرصة بعد كده انهم يعملوا (recommendation) لناس تانية وتتعرف عليك.
وهكذا بقا وتدور العجلة!
وكلها هترزق متقلقش.😁
١٨) عدل ع شغل البراندات والهويات البصرية واللوجوز بتاعتهم.
الحاجات ده بتلف الأنظار اكتر.
واعملهم منشنز فيها.
ومين عارف يمكن يكون (الإتش آر) مراته راضية عنه ومبسوط؛فيشوف شغلك،ويمسك تليفونه ،ويبعتلك الميل المنتظر.😃
١٩) خليك دايما موجود ع الجروبز والقنوات والمواقع اللي قولناها ده؛عشان تتعرف وتفضل ف البال ع طوول،وأي فرصة تنزل تشوفها بعين الصقر وتنقض ع البوست انقضاض الأسد ع الفريسة؛وتكون الملك المتوج بالوظيفة/ال (project) ان شاء الله.😉
٢٠) شوف دينياصورات وعمالقة المجال بتعمل إيه واعمل زيهم مش عيب دي صياعه.
أو اسألهم بتجيبوا شغل منين؟
‏بطريقة (friendly) طبعا!😅
٢١) حاول تتخصص ف قسم واحد من أقسام الجرافيك
يعتي يا تكون محترف وتقف ع اليمين مع اخواتنا (2D designers)،يا تقف ع اليمين التاني -عشان الكلمة التانية عيب-😂مع حبايبنا ال (3D designers).
٢٢) تخصص ف التخصص وخليك بروفيسور ف مجالك.
يعني انت ك (designer) تخصص ف (اللوجو/السوشيال ميديا/البوسترز والفلايرز/التصميمات التجارية والإعلانات/البراند ايدينيتي…إلخ).
لأن أنا لو عميل عايز لوجو وقدامي (٣ كريتيفز) :
واحد متخصص ف اللوجوز بس.
واحد متخصص ف اللوجوز وكام حاجة تانية.
واحد جرار بيخش ف كله ومش راحم.
وباعتبار إن شغلهم قريب من بعض.
ف انا هختار اللوجوز بس!
انت هتختار إيه؟😂
٢٣) علم الناس واعمل قاعدة جماهيرية حوالين لابك ال (Toshiba) اللي بتشرح منه هتتعرف بسرعة.
ومش شرط تشرح برامج التصميم بس ممكن تشرح شوية برامج بسيطة حتا للإيديت للتليفونات أو الكمبيوتر.
ف النهاية!
اشتغل ع نفسك!
طور كل يوم من شغلك!
ساعد غيرك تسعد!
وان شاء الله ربنا مش هيضيعك!
وقول يا باسط هتلقيها هاصت.
توكل انت بس ومتتواكلش!
وسيبها ع ربك اللي رزق الطير هيرزق أفضل خلقة!😍
لما يجيلك شغل بقا متنسانيش ف الحلاوة.
وهات معاك عيش وحبنة عشان نفطر مع بعض.😁
ولو عجبتك أي فكرة اعمل شير،
وخلي غيرك يستفيد ؛ عشان ربنا يكرمك ويزيدك يا كريتيف.
كتبه / اسامة محمد ، للتواصل مع الكاتب اضغط هنا لعمل لمساعدتك
‫0 تعليق

اترك تعليقاً